Gatumba: Guhagarika ibirombe by’amabuye y’agaciro byabateje ubukene

Abacururiza muri aya masoko nabo ngo ntibakibona amafaranga

Abacururiza muri aya masoko nabo ngo ntibakibona amafaranga

Abaturage n’abacuruzi bakorera mu murenge wa Gatumba bavuga ko guhagarika ubucukuzi bw’amabuye y’agaciro byabateje ubukene.

Umurenge wa gatumba ni umwe mu yicukurwamo amabuye y’agaciro menshi aho abaturage benshi babonaga mo akazi. Muri iki gihe hashize amezi agera kuri 6 ubucukuzi budakorwa neza ngo byateje ubukene ku bari bahafite akazi no ku bahakorera ibikorwa by’ubucuruzi.

Ubusanzwe ako gace kakorerwagamo n’isosiyete y’abanyafurika yepfo yitwa GMc (Gatumba Minning Concession), ariko iza guhagarika imirimo yayo mu mwaka wa 2015, ku mpamvu tutabashije kumenya. Nkuko umuyobozi wungirije ushinzwe ubukungu yabitangaje, iyi sosoyete yahaga akazi abantu 6500.

Abakoraga mu mabuye y’agaciro barataka ubukene

Abakoraga mu mabuye y’agaciro barataka ubukene

Nzabonimpa Emmanuel, umucuruzi ukorera ahitwa ku Cyome agace k’ubucuruzi kegereye ibirombe bya Gatumba, avuga ko kuri iki gihe bataibona amafaranga kubera ko gucukura amabuye y’agaciro byahagaze.

Ati « mbere amafaranga twarayabonaga rwose. Ariko ubu ni ukwanga kwicara gusa naho ubundi abaturage nta mafaranga bafite kubera ko batagicukura amabuye y’agaciro. Byadushimisha yongeye gutangira”.

Iyakaremye jean Bosco umwe mu bari bafite akazi muri ubwo bucukuzi nawe avuga ko kubuhagarika byabasubije inyuma, ku buryo amikoro yabaye make mu baturage batuye ako gace, ahanini bayakuraga ku bucukuzi.

Aba baturage bategereje igisubizo ku ruzinduko umunyamabanga wa Leta muri minisiteri y’umutungo kamere Imena Evode aherutse kugirira muri aka karere kuwa 9 Ukuboza 2015, aho yagenzwaga no kwegurira tumwe mu duce tw’ubucukuzi abikorera bahabyaza umusaruro.

Ruboneza Gedeon usanzwe ayobora akarere ka Ngororero we avuga ko impamvu gutangira ubucukuzi byatinze ari uko hagishakishwa abashoramari bafite ubushobozi bwo gucukura amabuye y’agaciro bya kinyamwuga, mu rwgeo rwo kongera umusaruro no kurengera ibidukikije.

 

Rulindo: Ikigo Ngali kizanye uburyo bushya bwo kunoza imisoreshereze

Abayobozi n’abakozi b’uturere baje gusobanurirwa ibijyanye n’imisoro

Abayobozi n’abakozi b’uturere baje gusobanurirwa ibijyanye n’imisoro

Umuyobozi wa RRA avuga kuburyo bushya bwo kunoza imisoreshereze

Umuyobozi wa RRA avuga kuburyo bushya bwo kunoza imisoreshereze

Kuri uyu wa gatanu, tariki 15/1/2016 Ikigo cy’Igihugu gishinzwe imisoro n’amahoro cyagiranye inama n’Ubuyobozi bw’Intara y’Amajyaruguru, n’ingabo, igamije kurebera hamwe uburyo bushya bw’Ikigo cya Leta  “Ngali” kigiye kurushaho kunoza imikorere yo kwishyuza abasoreshwa  no kongera umubare w’imosoro ku bufatanye n’Ikigo cy’Igihugu gishinzwe imisoro n’amahoro (Rwanda Revenue Authority).

Umuyobozi  w’Ikigo cy’Igihugu gishinzwe imisoro n’amahoro Richard Tusabe yagize ati “ kuko imisoro n’amahoro aribyo shingiro ry’ubukungu bw’Igihugu; niyo mpamvu hashyizweho ikigo Ngali kugirango hatagira abakomeza kunyereza imisoro ya Leta”.

Akomeza avuga ko hagiye  gushyirwaho  ingamba zihamye zo kumenya buri wese ugomba gusora, n’amafaranga agomba gusora, kongera umubare w’abasoresha mu rwego rwo gukurikirana neza imisoro.

Guverineri w’Intara y’Amajyaruguru Bosenibamwe Aime, yasabye abayobozi b’uturere gukorana n’inzego z’ibanze bakabasha kureba ahantu hose hashobora gukurwa imisoro haba mu masoko, ibirombe, ubutaka busorerwa, amazu y’ubucuruzi n’ibindi.

Abayobozi b’uturere n’abandi bakozi bafite aho bahurira n’imisoro, bagaragaje ko ikibazo cy’imyishyurize y’imisoro kigoranye  cyane, kubera ko abakozi basoresha badahagije ukurikije umubare w’abantu n’ahantu hose hagomba gusoreshwa.

Iyo ikaba n’intandaro y’uko bamwe mu bagomba gusora biborohera gukwepa imisoro ntibayitange,bityo bikaba igihombo ku Karere n’Igihugu kuko imisoro iba igomba kwinjira yose iba itabonetse.Abo bayobozi bishimiye cyane ko Ngali ije ari igisubizo bitezeho byinshi

Umushinga Ngali ukaba ufite ingamba zo kongera abakozi bafite ubumenyi buhagije , kandi hagakoreshwa ikoranabuhanga kugirango birinde abasoresha bashobora kurya ruswa cyangwa kuyanyereza, kandi bikazorohereza abaturage gusiragira bajya gutonda imirongo yo kwishyura imisoro, rimwe na rimwe bigatuma bakererwa bagacibwa n’amande.

Basabye abakozi babishinzwe kureba imibare y’abakozi bakwiriye bazakenerwa mu gikorwa cyo kwishyuza imisoro, kugaragaza ahantu hose hagomba guturuka imisoro kandi bagakoresha inama abacuruzi n’abandi abaturage bakabakangurira neza ibijyanye n’imisoro, bihaye ko bizakorwa mu cyumweru kimwe.

Gatsibo: Harebwe uburyo imisoro n’amahoro byazamuka

Abashinzwe imisoro n’amahoro hamwe n’ubuyobozi bw’Akarere ka Gatsibo bareba uko imisoro yagiye itangwa

Abashinzwe imisoro n’amahoro hamwe n’ubuyobozi bw’Akarere ka Gatsibo bareba uko imisoro yagiye itangwa

Ubuyobozi bw’Akarere ka Gatsibo bufatanyije n’inzego zishinzwe abasoreshwa, kuri uyu wa 19 Mutarama 2016 barebeye hamwe uburyo imisoro n’amahoro byazamuka.

Hari mu nama ngishwanama ku misoro izwi ku izina rya (Tax Advisory Council), hasuzumwa uko imisoro n’amahoro bihagaze kugeza ubu mu karere ka Gatsibo. Muri iyi nama abasoreswa bakaba bakanguriwe gusora ku gihe kugira ngo imisoro irusheho kuzamuka.

Umuyobozi w’Akarere wungirije ushinzwe iterambere ry’ubukungu Manzi Theogene, yasabye abagize iyi nama ngishwanama kurebera hamwe ingamba zafatwa, kugira ngo itangwa ry’imisoro n’amahoro rirusheho kugenda neza.

Yagize ati:” Ku bufatanye nabo bireba bose, byari bikwiye ko dufatira hamwe ingamba ntakuka kugira ngo turusheho kuzamura imisoro muri aka karere, kuko iyo abasora babikoze neza kandi ku gihe akarere nako kabyungukiramo, bityo n’iterambere ryako rikarushaho kwihuta.”

Komiseri w’abasora banini mu kigo cy’Igihugu cy’imisoro n’amahoro (RRA) Gakwaya Laurence, yasabye ubufatanye hagati ya RRA, Akarere n’icyigo cya Ngali holdings gishinzwe gukusanya imisoro, kugira ngo intego bihaye izagerweho nkuko byagenwe.

Ati:” kugira ngo imisoro izamuke ku rugero rushimishije ni uko abashinzwe gukusanya amahoro mu karere ka Gatsibo, bakagombye gukorana bya hafi n’imirenge kugira ngo abaturage bakangurirwe gusora kandi ku gihe.”

Akarere ka Gatsibo gafite intego yo kwinjiza imisoro n’amahoro mu mwaka w’ingengo y’Imari ya 2015-2016 agera kuri miliyoni 935,974,397 y’u Rwanda.

Ku bufatanye n’ikigo cy’Igihugu cy’imisoro n’amahoro (RRA) n’icyigo gishinzwe gukusanya imisoro n’amahoro mu karere ka Gatsibo (Ngali holdings), kugeza ubu bamaze kwinjiriza Akarere ka Gatsibo amafaranga agera kuri miliyoni 131,833,395 y’u Rwanda mu mezi atandatu ashize.

Rusizi: Abaturage ntibarasobanukirwa ko bagomba gusorera ubutaka

Rusizi: Abaturage ntibarasobanukirwa ko bagomba gusorera ubutaka

Umuyobozi w’umurenge wa giheke

Bamwe mu baturage batuye mu mirenge y’icyaro mu karere ka Rusizi baravuga ko  batari bazi ko bagomba gusorera ubutaka batuyeho.

Ibi aba baturage babigaragaje ubwo basobanurirwaga imikoreshereze y’ubutaka dore ko mu icyaro abenshi bakibufata uko bishakiye ndetse bamwe bakaba batarajya kuzana ibyangombwa byabo by’ubutaka kandi bimaze igihe byarasohotse

Nsabimana Eugene ni umwe mu baturage bo mu murenge wa Giheke avuga ko ari ubwambere bumvise ko ubutaka batuyeho cyangwa bacururizaho busorerwa gusa ngonubwo babisobanuriwe ngo barumva kubishyira mu bikorwa ari ibintu bigoye kubera ikibazo cy’amikoro make

Yagize ati” nubwambere twumvise ko ubutaka umuntu atuyeho abutangira amahoro kuko tutari twarabisobanuriwe ariko nubwo tubyumvise yewe kubishyira mu ibikorwa  ngonubwo babisobanuriwe barumva ari ibintu bitugoye”.

Rusizi: Abaturage ntibarasobanukirwa ko bagomba gusorera ubutaka

Abaturage bumvo uko bakwiye kubaka ingo

Kajimbwami Fabien we avuga ko atazi uko inzu atuyemo yayisorera kuko ngo no kuyibona yabikesheje akarima yari afite yagurishije

Yagize ati” wenda abacuruza da arikose sinzi ko inzu naba ntuyemo nayisorera nabwo kuyibona nayibonye ari uko nari nagurishije akarima wowese umuntu utagira na mituweri yabona ayo asorera inzu koko yewe jye sinzabishoborape”.

uhagararariye ikigo cy’igihugu gishinzwe umutungo kamere mu ntara y’iburengerazuba, Muvara Pothin nawe avuga ko icyo kibazo cyo kudasobanukirwa no gusorera ubutaka kigaragara koko ariko ngo kuba baratangiye kubegereza serivisi zubutaka ngo barabona hari ibizahinduka.

Ati” Twasanze koko ikibazo gihari ariko ntekereza ko bishobora kuba biterwa nuko byabasabaga gukora ingendo ndende bajya ku karere gusobanuza imikoreshereze y’ubutaka ariko kubera ko twatangiye kubegereza izo serivisi ku urwego rw’umurenge ndibaza ko hari ibizahinduka”.

Umunyamabanga nshingwabikorwa w’umurenge wa Giheke Nsabimana Theogene avuga ko kuba abaturage bo mucyaro bataramenya ko bagomba gusorera ubutaka bifite ishingiro kuko ari gahunda ije vuba gusa ngo uko bagenda barushaho kwegerezwa izo serivisi bizakemuka

Ubusanzwe abaturage bishyura amahoro y’ubutaka batuyeho cyangwa bacururizaho aho kuri metero kare 1 batanga amafaranga 5 buri mwaka.

Mukamira: Abaturage basanga badakwiye gusora nk’abatuye mu mijyi ikomeye

Gusoresha ubutaka ntibivugwaho rumwe

Gusoresha ubutaka ntibivugwaho rumwe

Abaturage bo muri Mukamira,ahafatwa nk’umujyi wa Nyabihu,bavuga ko amafaranga 30 bakwa kuri m2 y’ubutaka nk’umusoro ari menshi ku buryo batayabona.

Kuri bamwe mu bahatuye ngo haracyari  kare cyane kuba iki gice cyafatwa nk’indi mijyi ikomeye mu Rwanda ku buryo batangira gusorera nk’abayituyemo.

Bavuga ko bo babona muri Mukamira nk’ahakiri mu cyaro kuko amazu yaho amenshi aba adakodeshwa ndetse na make akodeshwa ntabe ari nk’ayo mu mijyi.

Ikindi ngo ubutaka bwaho nta gaciro kanini bufite nk’ubwo mu mijyi kuko ngo ahanini babuhingaho kandi bagereranije ibyo basaruraho n’umusoro bakwa,basanga umusaruro ubuvaho ngo utabasha kwishyura umusoro.

Gusoresha ubutaka ntibivugwaho rumwe

Gusoresha ubutaka ntibivugwaho rumwe

Umwe mu basaza batuye mu kagari ka Rurengeri utarifuje ko amazina ye atangazwa avuga ko mbere yajyaga yishyura amafaranga asaga gato ibihumbi 20 y’umusoro ku nzu n’ayo n’ikibanza ariko aho bagiriye Mukamira igice cy’umujyi ngo agomba kuzishyura ibihumbi 102.

Yagize ati “nibatwishyuze ayo dushoboye gusora bakurikije aho dutuye.Na mitiweli kuyibona ni uguhangayika keretse nk’iyo umuntu yejeje nk’uturayi akayishakamo niho umuntu ayibona.”

Yongeraho ko mu guca amafaranga y’imisoro basaba ko ababikora bashyira mu gaciro bakareba n’abo baka ayo mafaranga niba bayabona. Agira ati “kuvuga ngo tuzayavana muri iyi mirima dutuyemo,ntabwo twayabona.

Bivugwa ko ari mu mujyi ariko amazu ntawe uyakodesha,arakinze,ni mu giturage nta mafaranga tubona ni mu cyaro.”

Ibi binagarukwaho n’umukecuru witwa Ellen wo muri Mukamira ndetse n’abandi baturage bo muri ako gace bagaragaza ko ayo mafaranga y’umusoro bakwa ku mazu ari menshi ku buryo kuyabona bizabagora basaba ubuyobozi ko yagabanywa.

Umuyobozi w’akarere ka Nyabihu wungirije ushinzwe ubukungu Mukaminani Angela avuga ko yumvise ko iki kibazo ko abaturage bagifite.Gusa ngo umusoro washyizweho uteganywa n’itegeko.Ubusanzwe ngo itegeko rikaba riteganya hagati y’amafaranga 30 na 80 kuri m2.

Njyanama yo muri Nyabihu ikaba yaratoye amafaranga make ashoboka 30. Gusa ngo nuko abaturage batarabimenyera ariko ngo bashobora nabo kuba babikorera ubuvugizi.

 

Gishamvu: Isoko ryarimuwe barishima ariko babuze amazu bacuruzizamo

Gishamvu: Isoko ryarimuwe barishima ariko babuze amazu bacuruzizamo

Amazu yubatse hafi y’isoko

Abatuye mu Murenge wa Gishamvu bishimira ko isoko rya Busoro ryakuwe mu gishanga, ariko ngo ntibakibona amazu yo gucururizamo.

Agaragaza ko kuba isoko ryaremeraga mu gishanga ryarimuriwe i Musozi ahitwa i Rusasa byari bikwiye, Venuste Bizumutima agira ati “imvura yaragwaga, amazi yose yo mu bisi akamanuka no mu mazu ukabona amazi araca munsi y’inzu.” Yerekana aho isoko risigaye riremera ati “aha twimukiye ni hazima, kuko n’iyo imvura iguye nta mwuzure uhatera, harakamuka.”

Gishamvu: Isoko ryarimuwe barishima ariko babuze amazu bacuruzizamo

Amazu yacururizwagamo mbere hari mu gishanga

Aisha Nyiramana na we ati “hariya hari mu gishanga, imvura yagwa ari nyinshi ugasanga mu mazu umuvu wadusanzemo.” Avuga kandi ko gucukura umusarane aho isoko ryahoze bitari byoroshye kuko muri cm60 hari mu mazi.

Batekereza ko isoko ryubakiwe babona aho bacururiza

Ubundi isoko rya Busoro ryatangiye kwimurwa mu myaka ibiri ishize: habanje kwimurwa iry’amatungo rikimara kubakirwa muri iyo myaka ibiri ishize, mu kwa gatatu k’uyu mwaka himurwa iry’ubuconsho naho mu kwezi gushize kwa 11 himurwa abakoreraga mu maduka.

Ariko, abacuruza ubuconsho binubira ko bacururiza ahatubakiye. Aisha Nyiramana ati “iyo imvura iguye ibintu biranyagirwa, n’izuba rikatwica. Twifuza ko isoko ryacu ryakubakirwa.

Abakoreraga mu maduka na bo binubira ko amazu yubatse hafi y’isoko ari makeya, binatuma abahenda. Hari akodeshwa ibihumbi 25, andi 35.

Charles Hakizimana ati “bnaracuruzaga ariko narabyihoreye kuko urebye amazu ya hano asigaye ahenze  kubera ko akiri makeya.”

Appolinaire Habyarimana na we ati “nacuruzaga resitora ariko ubu narabiretse kuko ntabona aho mbikorera, kandi n’amazu ahari ubu arahenze. Twe duciriritse ntitwayigondera.“

Kandi ati “wenda isoko ryubakiwe, ryagira n’amazu mu mpande ku buryo abaciriritse bajya babona ayo gukodesha bagakoreramo.”

Umuyobozi w’akarere ka Huye, Eugène Kayiranga Muzuka, yizeza abanyagishamvu ko mu mwaka wa 2018 isoko bazaba baribonye. Agira ati “turateganya ko muri 2016-2017 iri soko rizatangira kubakwa, hanyuma muri 2017-2018 aha hantu hakazaba hari isoko risobanutse.”

Marie Claire Joyeuse

Rubavu : Abitabiriye Expo basabye Ko hari ibyakosorwa

Utubari dufite imizindaro twari dufite imyanya minini kurusha abamurika ibicuruzwa

Utubari dufite imizindaro twari dufite imyanya minini kurusha abamurika ibicuruzwa

Imurikagurisha y’iminsi 10 y’Intara y’Uburengerazuba yaberaga mu karere ka Rubavu yashojwe kuwa 29 Ukuboza abayitabiriye basaba Ko hakosorwa imitegurire.

Imurikagurisha ryateguwe n’urugaga rw’abikorera (PSF) mu Ntara y’Uburengerazuba, mu minsi icumi ryitabiriwe n’abamurika ibicuruzwa 140 naho abaje kuyisura no guhaha babarirwa mu bihumbi 50.

Umuhuzabikorwa w’urugaga rw’abikorera mu ntara y’Uburengerazuba, Ntakirutimana Jean Marie avuga imurikagurisha rya 2015, ryabaye ryiza kurusha izabanjije nubwo hari udukosa twabonetse.

Minisitiri Kanimba aherekejwe n’abandi bayobozi batambagira Imurikagurisha

Minisitiri Kanimba aherekejwe n’abandi bayobozi batambagira Imurikagurisha

“Dushingiye kubatera nkunga, abitabitiye imurikagurisha, batuye ko iri rikurikira ibera Kigali ku rwego rw’igihugu. Yitabiriwe n’abanyamahanga 17 bamurika ibikorwa byabo. Yari ifite umutekano kandi iba mu gihe cyiza abantu bayikeneye.”

Mu bayitabiriye bavuganye na Kigali Today banenga kuba itari ifite ubwiherero buhagije kandi Buri hanze ya Expo. Abitabiriye bakavuga ko batinyaga kunywa no kurya kugira badakenera ubwiherero kuko uwasohokaga yongeraga kwishyuzwa yinjiye.

Ubwiherero bwari bucye kandi buri hanze ya Expo

Ubwiherero bwari bucye kandi buri hanze ya Expo

Abandi bavuga ko igice kinini cya Expo cyari utubari dufite imizindaro isakuza. Bigatuma abasurwa badashobora gusobanurira ababagana.

Nubwo barimo amazi n umuriro, Kigali Today yashoboye gufata amashusho y’abamena imyanda mu Kivu ndetse bakavoma amazi y’ikivu bakayakoresha mu gutunganya ibiribwa nkuko hari abarongeraga ibirayi mu mazi y ikivu.

Bamwe mubakozi bategura ibiribwa muri Expo barongera ibirayi mu Kivu

Bamwe mubakozi bategura ibiribwa muri Expo barongera ibirayi mu Kivu

Ntakiritimana Umuhuzabikorwa wa PSF mu ntara y’Uburengerazuba avuga Ko abakoresheje amazi y’ikivu ari amakosa bakoze, naho ubwiherero ngo uwabushakaga yagombaga guhabwa icyangombwa kimufasha gusohoka no kwinjira atishyuye.

Minisitiri w’inganda n’ubucuruzi François Kanimba asoza Expo yatangaje ko bibabaje kuba Expo ibera Ku mupaka wa Congo n’u Rwanda ntihahire abanyecongo bayitabira. Ikindi yanenze n’uburyo itagaragayemo ibikomoka Ku bworozi kandi intara y’Uburengerazuba ibikizeho, atanga urugero rwa Foromage.

Minisitiri Kanimba asaba PSF kuzajya bajyana Expo no mutundi turere aho guhora bayikorera mu karere ka Rubavu.

Abitabiriye Expo twaganiriye  bavuga ko abategura Expo bazajya bibanda gufasha Cooperative z’ubukorikori kugaragaza ibyo zikora, kimwe n’uko abamurika bagomba kuzana ibishya bidasanzwe.

 

 

Gatsibo: Ba rwiyemezamirimo bagitangira barafashwa gutunganya imishinga

Gatsibo: Ba rwiyemezamirimo bagitangira barafashwa gutunganya imishinga

Abagore bishimira ko babonye abazajya babafasha kuzamura imishinga yabo

Abagore bo mu mirenge itandukanye mu karere Gatsibo bagitangira imishinga, barafashwa na bagenzi babo bafite ubunararibonye gutunganya neza imishinga yabo.

Ibi bikorwa binyujijwe mu matsinda y’abagore bakora imishinga itandukanye yo kwiteza imbere, bakabifashwamo n’imiryango y’abaterankunga irimo Urugaga rw’Abikorera PSF, EAR Diyoseze ya Byumba ku nkunga y’umushinga utegamiye kuri Leta wa CARE International.

Ubwo hakorwaga amatsinda mashya kuri uyu kane tariki 15 Ukwakira 2015, umukozi w’Urugaga rw’abikorera PSF muri gahunda ya Rwanda Chember of women Enterprenuers Kwizera Anitha, yavuze ko abacuruzi babimazemo igihe baba bamaze kugira ubunararibonye, bityo ngo iyo bahujwe n’abagitangira bituma nabo babasha kuzamura ubucuruzi bwabo.

Yagize ati:” Dufata abagore bagitangira imishinga y’ubucuruzi tukabahuza n’ababimazemo igihe babifitemo ubunararibonye kugira ngo babafashe mu kwitinyuka ndetse no kumenyera gukorana n’ibigo by’imari, bityo nabo babashe kuzamura ubucuruzi bwabo.”

Umwe mu bagore bagitangira imishinga y’ubucuruzi witwa Manirafasha Nadine wo mu murene wa Kiramuruzi, amaze iminsi atangiye umushinga w’ubucuruzi bw’inka, avuga ko gukorera mu matsinda bizamufasha kuzamura ubucuruzi bwe.

Ati:” Mfite ikizere gihagije ko ubwo mbonye abazajya bamfasha mu mushinga wanjye bizatuma ntongera guhuzagurika mu byo nakoraga, kuko wasangaga kubera kutagira uburambe ntabasha gucuna neza ibikorwa byanjye kubera gusesagura.”

Nikuze Abera Edina we ni rwiyemezamirimo ubimazemo igihe akaba akora ubucuruzi bw’ibitenge, nawe avuga ko mu gihe cyo gutangira umushinga haba hakirimo imbogamizi nyinshi ariko ngo bikaba bisaba kudacika intege no kumenya gucunga umushinga neza kugira ngo ubashe kukugeza ku iterambere.

Iki gikorwa cyo guhuriza hamwe abagore bagitangira imishinga n’abayifitemo uburambe, mu karere ka Gatsibo cyatangiriye ku bagore bagera ku bihumbi 25, bahabwa amahugurwa mu byiciro bitandukanye, nyuma hatoranywamo imishinga 30 iteguye neza kugira ngo abe ariyo iterwa inkunga.

Kamonyi: Abacururiza mu Nkoto barataka igihombo kubera kwimura isoko

Kuba aho bimuriye isoko , amazu y’ubucuruzi nayo ashobora gufunga

Kuba aho bimuriye isoko , amazu y’ubucuruzi nayo ashobora gufunga

Nyuma yo kwimurwa ku isoko rya Nkoto, abakorera mu mazu y’ubucuruzi barataka igihombo baterwa no kubura abakiriya baremaga isoko ryimuriwe muri Bishenyi.

Isoko rya Nkoto riherereye mu murenge wa Rugarika, ryaremaga ku wa gatatu wa buri cyumweru ariko guhera tariki 2/12/2015 ryimuriwe muri Bishenyi mu murenge wa Runda. Abacuruzi ndetse n’abaturage baricururizagamo  bavuga ko ryimuwe batabimenyeshejwe, none barakorera mu gihombo.

Nkoto yimuriwe mu isoko rya bishenyi

Nkoto yimuriwe mu isoko rya bishenyi

Abacuruzi batangaza ko n’ubusanzwe babonaga abaguzi ku munsi w’isoko, ariko bagacuruza byinshi ku buryo ntacyo byari bibatwaye. Umwe muri bo ufite iduka, aragira ati “ amafaranga make nacuruzaga ku munsi w’isoko ni ibihumbi 100Frw ariko ubu sinshobora no gucuruza ibihumbi 15Frw. Ni ugufunga!”.

Abaturage bazana imyaka mu isoko nabo basanga gufungirwa Nkoto barabirenganiyemo, kuko imikorere y’isoko rya Bishenyi itandukanye n’irya Nkoto cyane cyane ku kibazo cy’imisoro yakwa abahinzi.

Ngo umuhinzi ujyanye imyaka arayinjiza mu isoko ari uko abanje kuyisorera kandi n’umucuruzi uyiranguye agasora, mu gihe mu Nkoto hasoraga umucuruzi gusa.

Impamvu zateye kwimura isoko rya Nkoto ni uko ryaremeraga mu nkengero z’umuhanda kandi ridatwikiriye. Dushimimana Emmanuel, perezida w’abikorera mu murenge wa Rugarika, atangaza ko habayeho inama nyinshi zibagezaho imishinga yo kuryimura , ariko ngo mu gihe bari bamaze kwemeranywa ko rizimurirwa hafi yabo, bahakaniwe ko hatabaho amasoko abiri yegeranye.

Ati “bari bavuze ko baryagurira hirya hahinze amaterasi. Nk’abacuruzi, twari twasabye akarere ko batwimuriye abantu, abacuruzi twakwiyubakira isoko ryiza nk’irya Musambira cyangwa irya Kayenzi.

Nubwo abaturage n’abacuruzi bavuga ko ubuyobozi bwafashe icyemezo cyo kwimurira isoko rya Leta mu rya Rwiyemezamirimo batabamenyesheje, Umunyamabanga nshingwabikorwa w’umurenge wa Rugarika Nsengiyumva Celestin,  atangaza ko kwimurwa kw’isoko byumvikanweho n’abahagarariye abacuruzi ndetse n’abavuga rikumvikana bo mu murenge.

Icyemezo cyo kwimura isoko rya Nkoto cyafashwe n’Inama Njyanama y’akarere. Ariko abacuruzi n’abaturage baracyasaba gukorerwa ubuvugizi ngo barigarurirwe. Ngo basanga irya Nkoto barihaye umunsi umwe mu cyumweru ntacyo ryaribangamiraho irya Bishenyi rirema buri munsi.

 

Rulindo: Abafite ubumuga berekanye ko haribyo bashoboye

 Uzakiruru Mediatrice ugendera mu kagare uhagarariye Koperative Cotribu.

Uzakiruru Mediatrice ugendera mu kagare uhagarariye Koperative Cotribu.

Umunsi ngarukamwaka wahariwe abafite ubumuga ku rwego rw’Akarere wizihirijwe mu Murenge wa Buyoga, Akagari ka Butare, Umudugudu Wa Kankanga.

Rulindo: Abafite ubumuga berekanye ko haribyo bashoboye

Umuyobozi wungirije  ushinzwe imibereho myiza mu Karere ka Rulindo Niwemwiza Emmilienne hamwe n’abandi bitabiriye umunsi mpuzamahanga wahariwe abafite ubumuga basura ibikorwa abafite ubumuga bakora

Uwo munsi wari ufite insanganyamatsiko igira iti “Twubake ubushobozi kuri bose, duteza imbere ibikorwa bidaheza”. Iki gikorwa cyaranzwe  no kwerekana ibikorwa bitandukanye abafite ubumuga bakora; harimo kudoda imyenda, ibipupe by’abana , gukora inigi zambarwa bakoresheje impapuro, ubuhanzi  n’ibindi.

Umuyobozi wungirije  ushinzwe imibereho myiza mu Karere ka Rulindo Niwemwiza Emmilienne hamwe n’abandi bitabiriye umunsi mpuzamahanga wahariwe abafite ubumuga

Umuyobozi wungirije  ushinzwe imibereho myiza mu Karere ka Rulindo Niwemwiza Emmilienne   yavuze ko Akarere katabirengagije kagiye kabitaho, hari abishyuriwe imyuga bariga, gahunda ya Girinka yabagezeho, n’abafashijwe na VUP kwiteza imbere.

Yabasabye gukora iyo bwabaga nabo bakagira aho bagera kuko bahawe agaciro, kandi ntibahore bategereje guzatungwa n’ubufasha gusa ko ataribyo kuko hari ibyo bashoboye.

Abafite ubumuga bagiye gushyirwa mu byiciro nk’abandi kugirango haboneke ibyo bajya bashingiraho mu kubaha ubufasha. Yabashishikarije kandi kujya bitabira gahunda za Leta.

Bajyinama Viateur umuhuzabikorwa w’inama y’igihugu y’abantu bafite ubumuga mu karere ka Rulindo, bimwe mubyo bagiye bageraho mu myaka itannu barangije, bahaye inka 197 abanyamuryango, banatera inkunga amakoperative yabo.

Ku munsi w’ejo baremeye abafite ubumuga 5 babaha inka 5, bateye inkumga Koperative 6, baziha  amafaranga angana na miliyoni 1 n’ibihumbi 400.

Bajyinama ati “Kera ngo ababyeyi babyaraga umwana ufite ubumuga banywaga imiti bavuga ngo bagushije ishyano, ibyo sibyo kuko nabo ni abantu nk’abandi,barashoboye”. Yasabye abaturarwanda bose ko batagomba guheza abafite ubumuga mu bikorwa by’iterambere.

Uzakiruru Mediatrice ugendera mu kagare utuye mu Murenge wa Buyoga, Umudugudu wa Mataba, uhagarariye Koperative Cotribu yabashije kwiga amashuri yisumbuye, yiteza n’imbere kuko afite imashini idoda yaguze amafaranga ibihumbi 200, bakora Londereza n’ibindi. Ati “ Turashoboye rwose”.

Abafite ubumuga bashimiye cyane abafatanyabikorwa babafashije, harimo na  Padiri wa Paruwasi  Muyanza n’ababikira bakorana, uburyo bagiye babafasha ndetse bamwe bakanavuzwa ku buryo buhenze ariko bakaba barakize.

Follow

Get every new post delivered to your Inbox

Join other followers