Rutsiro: abikorera Bashima ko bashyiriwe ho amahirwe yo kumurika ibyo bakora.

Rutsiro: abikorera Bashima ko bashyiriwe ho amahirwe yo kumurika ibyo bakora.

Kuwa gatanu tariki ya 15 Gicurasi mu karere ka Rutsiro hashojwe imurikabikorwa ry’abikorera batandukanye bakorera muri rutsiro, bishimira ko babonye amahirwe yo kwereka abaturage ibyo bakora ariko ngo inshuro imwe mu mwaka ntihagije.

Imurikabikorwa ngo rituma abantu b’ingeri zose baza kureba ibyo bakora bityo ababagana aho bakorera bakiyongera ku buryo babona inyungu ariko ngo byaba byiza imurikabikorwa ribaye kenshi mu mwaka ngo kuko umubare w’ababagana wakwiyongera.

Mugemangabo Jean Bosco utuye mu murenge wa Gihango uhinga ibitoki bipima ibiro byinshyi yagize ati” kumurika ibikorwa byacu biradufasha nk’ubu nkanjye ubushize ubwo nazaga mu imurikabikorwa narushijeho kubona abangana baje kungurira ibitoki nko muri Karongi baraje ndetse na za Rubavu, nkumva rero nko mu mwaka ribaye inshuro nk’ebyiri cyangwa zirenze narushaho kubona abakirirya”

Niyibizi Gilbert ufite sosiyete ikora amatafari n’amategura ikorera mu murenge wa Manihira yavuze ko nawe abona kumurika ibikorwa byabo bityo isoko rikaguka hirya no hino bakamenya aho bakura ibyo bakeneye ndetse n’ababikora bakabona isoko ku buryo bworoshye.

Umuyobozi w’akarere Gaspard byukusenge yijeje abikorera ko hazabaho kwicara bakareba niba byashoboka biityo bakaba bategura imurikabikorwa inshuro zirenze imwe aho yagize ati”nibyo imurikabikorwa rifasha akarere ndetse n’abaturage tuzaganira n’urugaga rw’abafatanyabikorwa JAF dusanzwe dufatanya kuritegura nibishoboka tuzareba uko twategura imurikabikorwa inshuro nyinshi”

Uretse abikorera batangaza ko imurikabikorwa ribafasha n’abaza muri iryo murikabikorwa bavuga ko bituma nabo bamenya aho bashakira icyo bakeneye mu gihe bibaye ngombwa.

N’ubwo bamwe bavuga ko bibafasha kubona ababagana hari bamwe banze kuryitabira ngo kuko bituma batakaza amafaranga kandi ntacyo bacuruza bityo bagahitamo kwikomereza ubucuruzi bwabo.

Iri murikabikorwa ryatangiye ku wagatatu tariki ya 13 Gicurasi risozwa kuri uyu wa gatanu tariki ya 15/05/2015 rikaba ryaritabiriwe n’abikorera batandukanye harimo ibigo n’amabanki ndetse n’abacuruza ibintu bitandukanye.

Mbarushimana Cisse Aimable.

Nyamagabe: Hari bamwe mu rubyiruko rumaze kugera ku bikorwa by’iterambere

Nyamagabe: Hari bamwe mu rubyiruko rumaze kugera ku bikorwa by’iterambere

Umuyobozi w’akarere asura ibikorwa by’urubyiruko

Bamwe mu rubyiruko rwo mu karere ka Nyamagabe, rumaze kugera kubikorwa byo kwiteza imbere byivugira, nyuma y’uko bamwe muri rwo batabashije gukomeza amashuri kubera ubushobozi bucye, bagahitamo gukora ibikorwa bibateza imbere.

Muri uku kwezi kwahariwe ibikorwa by’urubyiruko, kwatangiye ku ya 5 Gicurasi, 2015 hagenda harebwa ibikorwa bitandukanye by’iterambere urubyiruko rwaba rwigejejeho kandi bakarugira n’inama kugira ngo imishinga rukora itazahomba.

Nyamagabe: Hari bamwe mu rubyiruko rumaze kugera ku bikorwa by’iterambere

Ingurube zorowe n’urubyiruko

Urubyiruko rwishyize hamwe muri koperative “Terimbere Rubyiruko” ikora ubworozi bw’ingurube mu murenge wa Gasaka, akarere ka Nyamagabe, mu kiganiro twagiranye rwatangaje ko, bahereye ku ngurube 3 ubu zimaze kuba 16 mu gihe cy’amezi make gusa.

Uwitwa Tereza Bizumutima aravuga ko gukurikiza inama babagira no gukora cyane byabazaniye inyungu.

Nyamagabe: Hari bamwe mu rubyiruko rumaze kugera ku bikorwa by’iterambere

Yagize ati: “umunyamuryango ntago yigera abura mutuweli turayimuha, ibishashi by’ingurube dufite bimaze kugira agaciro k’amafaranga menshi, dufite n’amafaranga kuri konti arenga 500,000 ayo yose twagiye tuyabona kubera ko turimo korora.”

Uru rubyiruko rukaba rufite na gahunda yo gukangurira bagenzi barwo kwishyirahamwe mu bikorwa bibateza imbere, bagakomeza no gufashanya kandi bagafasha n’abakene.

Uwitwa Emile Kamuranga aravuga ko ingurube borora ni ziba nyinshi bazabasha koroza abaturage batishoboye.

Yagize ati: “iyo umuntu agize ikibazo mu rugo iwe cy’uburwayi, cyangwa agapfusha umuntu turamufasha, ikindi ingurube nizimara kororoka bihagije tuzagenda tworoza n’abantu bakennye cyane kurenza abandi.”

Urubyiruko ruragirwa inama yo gukora ariko ruteganyiriza ejo hazaza kugira ngo imishinga rukora izarambe nk’uko umuyobozi w’akarere Philbert Mugisha yabidutangarije ubwo yasura ibi bikorwa.

Yagize ati: “urubyiruko rukwiye gutekerereza mu myaka myinshi mu buryo burambye uko bagakwiye kuba babaho, bivuga ko umushinga bafite ukwiye kuba ari umuhsinga uramba, kandi bakabigira mo uruhare banizigama, bateganyiriza ejo hazaza.”

Uyu mushinga w’ubworozi bw’ingurube ukaba waratewe inkunga n’umuryango wabanyakoreya Semaul Dong, ukubakira ibiraro.

Caissy Christine Nakure

Rukira: Tailors advised to form a cooperative

3

Rukira sector administration in Ngoma district advised up to 10 elderly men and women tailors working in Rukira market to form a cooperative for sustainable development.

This comes after women and men tailors working from Rukira market decry lack of customers, saying clients look for younger tailors who know modern designs.

One of them Sevornie Nyirahabimana, revealed that of late customers come looking for young tailors with the belief that old tailors are unaware of modern designs.

“Like in 1994 I had up to Rwf200, 000 on my account and other properties acquired from my profession. However, these days I earn so little because the young tailors get all the customers because we are old and unaware of new designs,” lamented Nyirahabimana.

Other tailors told this website that they now do building and farming alongside tailoring because they do not earn enough to cater for their families.

Mathias Ngenda, executive secretary of Rukira sector highlighted that the reason these tailors are not earning enough from their profession is because they work as individuals than working together in a cooperative and set up a tailoring workshop.

“We always advise them to form a cooperative but in vain due to fear of rent and taxes. However, we will continue to advise them because one cannot attain development while working as an individual,” said Ngenda.

This comes when the government encourages residents to form cooperatives, access bank loans and achieve fast social and economic development.

Rusizi: Abikorera barasabwa guhindura imyumvire mubufatanye na Leta

1

Abikorera bo  mu karere ka Rusizi barasabwa guhindura imyumvire y’ishoramari bava mu bikorwa byo kwirwariza buri wese  ku giti cye ahubwo bakibumbira hamwe mubikorwa rusange bibabyarira inyungu kandi birambye.

ibi babisabwe n’ishyirahamwe ry’uturere n’umujyi wa Kigali (RALGA) ku wa 16/05/2015, nyuma yo kubona ko ishoramari ry’abikorera bo muri rusizi rikiri hasi nyamara kandi ari akarere gafite amahirwe menshi yo gukoreramo imishinga ibyara inyungu kuburyo bwihuse bitewe nuko gaturiye imipaka y’ibihugu bibiri.

2

Gihoza Bizimungu Jean ushinzwe ibikorwa byo gusuzuma imigendekere y’ishoramari ry’abikorera ry’uturere n’umujyi wa Kigali avuga ko hakigaragara akajagari kenshi mubikorera aho usanga bakorera mumabutiki abandi bakirirwa babunza bunza udutaro mugihe nyarama bahuriza hamwe bagakora igikorwa cy’umushinga munini bazamura aho kwirirwa mu bikorwa by’inyungu zigihe gito

Habyarimana Julibert umwe mubikorera bo mu karere ka Rusizi  avuga ko inama nyinshi bagenda bahabwa zibasaba kwibumbira hamwe bagiye kuzikurikiza kugirango babashe kwiteza imbere dore ko ngo muri aka karere bafite amahirwe bakoresha neza akaba yabayarira inyungu

Icyakora Habyarimana akomeza gutangaza ko bahura n’imbogamizi zikomeye mu gutangiza ibikorwa by’imishinga migari harimo kuba abikorera bose bataragira imyumvire imwe aho usanganga ari bake bumva iyo gahunda aha agasaba ko Leta n’izindi nzego z’abikorera zakomeza kubishyiramo imbaraga kugirango abikorera koko bazabashe kuyobora ubukungu bw’igihugu

Umuyobozi w’akarere ka Rusizi wungirije ushinzwe ubukungu Kankindi Leoncien avuga ko mugihe abashoramari bahindura imyumvire bakishyira hamwe ngo byatuma batera imbere ubwabo utaretse n’akarere dore ko hari amahirwe menshi yo kubigeraho harimo ubucuruzi bwambukiranya imipaka dore ko ari akarere gaturiye imipaka y’ibihugu bibiri.

Umuyobozi w’akarere wungirije ushinzwe ubukungu Kankindi akomeza kuvuga ko bazagerageza gufasha abikorera kubakorera ubuvugizi babafasha no gukemura imbogamizi bahura nazo mu ishoramari ryabo kugirango babashe kugera aho bifuza munyungu zabo n’igihugu muri rusange.

 

Rukira: Abashaje badodera mu isoko barakangurirwa gukorera mu makoperative

Rukira: Abashaje  badodera mu isoko barakangurirwa gukorera mu makoperative

Abasaza n’abakecuru badodera mu isoko rya Rukira ho mu karere ka Ngoma barakangurirwa n’ubuyobozi bw’uyu murenge  gukorera mu makoperative kugirango babashe kwiteza imbere  byihuse kuko gukora bonyine bitabageza ku iterambere.

Aba basaza n’abakecuru barabikangurirwa mugihe bataka ko batakibona abakiriya ngo bitewe nuko baza bishakira abakiri bato bibwira ko abashaje nta modeli zigezweho baba baziho.

Nyirahabimana Sevornie,umwe muri aba basaza n’abakecuru bagera hafi 10 badodera mu isoko,avuga ko  amaze imyaka 40,adodesha imashini ariko ko ubu atakibonamo  amafaranga kuko  ibiraka bishyushye byitwarirwa n’abakiri bato.

Yagize ati” Nko muri 1994 nari mfite ibihumbi 200 kuri kinti ya banki ndetse n’amasambu n’inzu byose nakuye mu mashini. Ubu ngubu aho bigeze ntamafaranga ikinjiza ubu  mba naje kureba ko nabona  akunyu n’agasabune. Ibiraka bishyushye byitwarirwa nabakiri bato twe ngo ntituzi modeli zigezweho.”

Abandi basaza badodera muri iri soko usanga bavuga ko ubudozi babufatanya n’indi myuga nko guhinga no kubaka,bitewe nuko babona kudoda gusa bitabatunga nkuko mbere bakiri bato byabagendekeraga.

Ku ruhande rw’ubuyobozi bw’umurenge wa Rukira,bo bavuga ko impamvu batabasha kubona abakiriya ngo kudoda bibatunge,aruko bakora mu buryo bwa nyamwigendaho  ntibahuze imbaraga mu makoperative ngo bashing atoriye.

Ngenda Mathias umuyobozi w’umurenge wa Rukira, yagize ati”Duhora tubakangurira kwibumbira mu makoperative ariko usanga batahita babyumva,abantu iyo bakuze burya biragorana. Hari ubwo usanga batinya igishoro cyo gukodesha amazu,imisoro n’ibindi. Turakomeza tubegere kuko ntiwakora wenyine ngo utere imbere.”

Mu busantire bw’uyu murenge uhasanga amazu menshi badoderamo(atoriye z’ubudozi) ndetse abakoreramo bakavuga ko babona abakiriya kandi bikabasha kubatunga, mugihe aba basaza bo bagaragaza imbogamizi z’igishoro kugirango nabo babe bakishyira hamwe.

Nubwo bavuga ko Babura igishoro,kurundi ruhande usanga bose bagaragaza imbogamizi ikomeye yuko batashobora gukora igihe kinini kuko bashaje

ndetse ngo no kwita ku bana n’urugo nabyo ngo bibabera imbogamizi zo kuba bakora buri munsi badahinga ngo bite ku bana.

 

Ruhango:  Financial support pledge to Women, Girls

Up to 55 women and girls from all sectors of Ruhango District are set to receive financial support to expand their small income generating projects and help others create jobs.

Financial support pledge to Women, Girls

The beneficiaries have been selected from different sectors under “Kora Wigire” a government program that aims at creating off farm jobs and promote entrepreneurship.

The beneficiaries are those who have viable projects but lack enough capital to expand their ideas.

Kora Wigire targets to create over 2000 jobs every year. The main focus is put on youth and women who make the biggest per cent of Rwandans.

Sara Delphine Mukabadege in charge of labour in Ruhango district revealed that every beneficiary will receive Rwf100000 to help them expand their projects.

Sara Delphine Mukabadege in charge of labour in Ruhango District

Sara Delphine Mukabadege in charge of labour in Ruhango District

She added that those 55 women and girls have undergone 2days training under “kora wigire” National employment program with the aim of increasing their knowledge on managing their projects.

Training started on 14th May 2015 and participants revealed that after training, they realized that one does not require to start big in order to achieve social economic development.

Charlotte Niyonsaba, vegetable and fruit seller in Karambi trading centre in Kabagali cell confirmed that training was beneficial, adding he will share the knowledge with others who still fear to start projects.

Another beneficiary Fabien Gatete, egg seller in Ntenyo centre in Byimana sector highlighted he was ashamed of his business but training recharged him to continue and become creative for more profits.

Francois Xavier Mbabazi, mayor of Ruhango district asked participants to strive to achieve their set goals of becoming entrepreneurs that benefits the country.

Kora wigire program works alongside Hanga umurimo, Yego, Business Development Centre (BDC) and other programs that help residents get skills, create jobs or get them.

Ruhango:  Abagore n’urubyiruko bemerewe kuremerwa kugirango bihutishe iterambere

Ruhango:  Abagore n’urubyiruko bemerewe kuremerwa kugirango bihutishe iterambere

Urubyiruko n’abagore bagera kuri 55, baturuka mu mirenge yose igize akarere ka Ruhango, bagiye guhabwa amafaranga azabafasha kongerera ubushobozi bwabo mu byo basanzwe bakora kugirango, barusheho kwiteza imbere no guteza abandi imbere.

Abagiye guhabwa aya mafaranga, bakaba ari abantu bagiye batoranywa mu mirenge, ariko bakaba bari bafite ibitekerezo byo gukora imishinga iciriritse bagahura n’imbogamizi zo kutagira igishora gihagije.

Ruhango:  Abagore n’urubyiruko bemerewe kuremerwa kugirango bihutishe iterambere

Mukabadege Sara Delphine ushinzwe guteza imbere umurimo, mu karere ka Ruhango, yavuze ko muri aba bantu, buri umwe azagenerwa amafaranga ibihumbi 100, azaza yunganira imishinga yabo basanzwe bakora.

Aba bantu uko ari 55, bakaba bamaze iminsi ibiri bahugurwa muri gahunda ya “kora wigire” National employment program,  amahugurwa agamije kubongerera ubumenyi mu byo bakora, kugirango batazasubira inyuma.

Abitabiriye aya mahugurwa banitegura guterwa inkunga, bavuga ko bari basanzwe bakora utuntu ducirirtse bakadusuzugura, ariko muri aya mahugurwa ngo bungukiyemo ko gutera imbere bidasaba guhera kuri byinshi.

Niyonsaba Charlotte ukorera ubucuruzi bw’imbuto mu gasantire ka Karambi umurenge wa Kabagali, yavuze ko yungukiye byinshi muri aya mahugurwa, akizera ko agiye kuyasangiza abandi bakitinya mu gutangiza iminsinga, bityo bose bagatera imbere.

Naho Gatete Fabien ucuruza amagi mu gasantire ka Ntenyo mu murenge wa Byimana, avuga ko yajyaga yisuzugura ndetse akamva akazi kamuteye ipfunwe, ariko ngo aya mahugurwa amwongereye icyizere cy’uko agomba gukomeza ibyo akara, ahubwo agashyiramo udushya twinshi.

Abazahabwa aya mafaranga nyuma y’aya mahugurwa, bizerako imishinga yabo bagiye kurushaho kuyiteza imbere.

Umuyobozi w’akarere ka Ruhango Mbabazi Francois Xavier, yasabye urubyiruko n’abagore bari muri aya mahugurwa yatangiye tariki ya 14/04/2015, ko bagomba gukomeza bakagera ku ntego bihaye, bakaba barwiyemeza mirimo bazagirira igihugu akamaro.

 

 

Nyaruguru: Abacuruzi babangamiwe no kwikubira amafaranga kw’ibigo binini

Nyaruguru: Abacuruzi babangamiwe no kwikubira amafaranga kw’ibigo binini

Bamwe mu bacuruzi bo mu karere ka Nyaruguru baratangaza ko babangamiwe n’uburyo ibigo bikoneye ndetse n’inganda ngo byikubira amafaranga akagumamo imbere, ntasohoke ngo agre no ku bandi bacuruzi.

Aba bacuruzi bavuga ko ibi bigo ndetse n’inganda ngo biba bikoresha abaturage benshi, kuburyo ngo iyo byabahembye amafaranga aba yabonetse ari menshi.

Aba bacuruzi bavuga ko mbere ibigo n’inganda byahembaga abakozi hanyuma nabo bakajya kugura ibyo bakeneye ku bacuruzi begereye babyegereye, ariko ubu ngo muri ibi bigo ndetse n’inganda basigaye bacururizamo imbere, kuburyo umuturage uhakora ariho ahahira, bigatuma nta faranga risohoka mu kigo cyangwa uruganda.

Nyaruguru: Abacuruzi babangamiwe no kwikubira amafaranga kw’ibigo binini

Twiringiyimana Jean Bosco ucururiza mu gasantere ka Mata, kegereye uruganda rw’icyayi rwa Mata, avuga ko muri uru ruganda imbere ngo harimo umuntu ucururizamo ibicuruzwa byose abaturage bakenera, kuburyo ngo banabaha amadeni bakaziyishyura igihe cyo guhembwa kigeze.

Ibi ngo bituma nta faranga risohoka mu ruganda, nyamara kandi ngo uwo muntu uba acururiza mu ruganda hari igihe aba nta musoro atanga, bigatuma abacururiza hanze banasora batanona amafaranga.

Ati:” Abacuruzi b’I Mata abenshi barafunze. Amafaranga aguma mu ruganda, kuko ibicuruzwa abaturage babifata mu ruganda, noneho igihe cyo guhembwa bakayakuramo, ntagire ifaranga atahana”.

Ubu buryo kandi ngo butuma umuturage agwa mu gihombo, kuko akenshi ngo muri ibi bigo ndetse n’inganda, ibicuruzwa babiha abaturage ku giciro kiri hejuru, kuburyo ngo umuturage ukeneye amafaranga iyo ashatse kugurisha ku bicuruzwa yavanye mu ruganda ngo yikenure, agurisha kuri make, ugeraranije n’ayo yabifatiyeho.

“ Bagaragaza ko bafasha abaturage nyamara ari ukubatsikamira, kuko iyo babahaye ibiribwa babibaha ku giciro cyo hejuru, ushatsemo ifaranga we akagurisha kuri makeya”-Hategekimana, umucuruzi.

Umuyobozi w’uruganda rw’icyayi rwa Mata Mungwakuzwe Yves we avuga ko mu ruganda ayobora nta bucuruzi budasanzwe buhakorerwa, ko ahubwo ngo hari kantine yo gufasha abakozi kubona icyo barya igihe bari mu kazi, na cyane ko ngo abenshi baba baraturutse hirya no hino mu turere dukikije Nyaruguru.

Ati:” Twebwe abakozi benshi dukoresha mu mirima ni abaturuka za Gikongoro na Huye,kugirango rero babashe kubaho mu ruganda hari kantine ibaha ibyo kurya bakazishyura ukwezi gushize. Birumvikana umuntu ntiyava ku kazi ngo abure umuceri wo guteka kandi ari umukozi”.

Nyaruguru: Abacuruzi babangamiwe no kwikubira amafaranga kw’ibigo binini

Umuyobozi w’akarere ka Nyaruguru wungirije ushinzwe imari n’iterambere ry’ubukungu niyitegeka Fabien, avuga ko kuba uruganda rwagira kantine ntacyo bitwaye, gusa akavuga ko niba hari inganda zifite ububiko bw’ibiribwa, bazabigenzura bakamenya impamvu yabyo, kandi hakazafatwa umwanturo utabangamiye abandi bacuruzi.

Mu karere ka Nyaruguru ubu habarurwa inganda 2 z’icyayi arizo, uruganda rwa Nshili ndetse n’urwa Mata, hakaba n’urutaruzura rw’umushoramari, ruherereye mu murenge wa Kivu.

Charles RUZINDANA.

Nubwo “gusudira” inkweto bimwotsa intoki ngo ntiyabireka kuko aribyo bimutunze

Nubwo “gusudira” inkweto bimwotsa intoki ngo ntiyabireka kuko aribyo bimutunze

Mu rwego rwo kwihangira imirimo, hirya no hino mu Rwanda uhabona abantu batandukanye bahimbye cyangwa se batangije imirimo runaka ibinjiriza amafaranga buri munsi bityo bakikura mu bukene

Nubwo “gusudira” inkweto bimwotsa intoki ngo ntiyabireka kuko aribyo bimutunze

Nko mu karere ka Burera hagaragara abo bita “abasudizi” basudira inkweto za palasitike (Plastic) bakoresheje ibyuma bishyushye kuburyo binabotsa intoki.

Bemeza ko uwo murimo ubinjiriza amafaranga abatunga n’imiryango yabo nubwo ngo hari ababona ko kuwukora bisuzuguritse.

Nubwo “gusudira” inkweto bimwotsa intoki ngo ntiyabireka kuko aribyo bimutunze

Bizimana Felicien, umwe muri abo basuduzi, yicaye ku gatebe kagufi, imbere ye hari umuriro yacanishije ibiti, ashyiramo icyuma akoresha, cyamara gushyuha akagishyira ku rukweto rwa palasitike, akaruteraho ikiremo ibyo yita “gusudira”.

Bizimana avuga ko uwo mwuga ariwo umutunze kuko awukora buri munsi. Asudira cyane cyane inkweto zambarwa n’abagore zizwi ku izina rya “mwamini” ndetse na bote.

Ngo iyo yabonye abakiliya, ku munsi ashobora gukorera amafaranga y’u Rwanda ari hagati y’ibihumbi bibiri na bitatu. Aca amafaranga umukiliya bitewe n’uko urukweto rwanigitse. Ngo hari urwo asudira ku mafaranga 150 cyangwa se 400.

Akomeza avuga ko mu myaka 14 amaze akora uwo murimo, yikuye mu bukene, atunga umugore we n’abana batatu. Agira ati “Nakuyemo ihene, nkuramo intama, n’igare uraribona.”

Bizimana asudira inkweto akoresheje intoki nta kintu kindi yambayeho. Kuburyo ibyuma akoresha, biba bishyushye, bimwotsa.

Agira ati “Gushya ho ndashya ariko gushya ntabwo byatuma ntaha! Gusa ntacyo bintwaye bambe! Mpiye nkabona agafaranga ko kumbeshaho nta kibazo.”

Akomeza avuga ko akorera ako kazi ke mu rugo. Ubundi ku wa gatatu no ku wa gatandatu akajya kugakorera mu isoko rya Rugarama. Muri iryo soko ngo niho abona amakiliya benshi.

Bizimana avuga ko kandi ubwo mu Rwanda hashyirwagaho gahunda yo kwambara inkweto kuri bose, aribwo abasudira inkweto babonye amakiliya benshi bituma n’amafaranga binjiza yiyongera.

Yongeraho avuga ko ntawe ukwiye gusuzugura umurimo runaka. Icya mbere ngo ni uko uba utunze nyirawo.

Nyamagabe: Abafite ubumuga bwo kutumva no kutavuga bihangiye imirimo ibateza imbere

Abafite ubumuga bwo kutumva no kutavuga bihangiye imirimo ibateza imbere

Bamwe mu rubyiruko rufite ubumuga bwo kutumva no kutavuga bihangiye imirimo ibateza imbere, batitaye ku bumuga bwabo, ubu babasha kwiyambika, kubona icyo kurya no kubona aho kuba.

Abafite ubumuga bwo kutumva no kutavuga bihangiye imirimo ibateza imbere2

Uko iterambere rigenda ryihuta kandi hakabaho gahunda zitandukanye zo gushishikariza abantu gukora hamwe n’abafite ubumuga butandukanye, byatumye hari abafite ubumuga bumvako nabo hari icyo bashobora gukora cyabateza imbere.

Abafite ubumuga bwo kutumva no kutavuga bihangiye imirimo ibateza imbere3

Kigali Today yaganiriye na bamwe bafite ubumuga bwo kutumva no kutavuga bihangiye umurimo wo gukora amasanduka bakunze kwita mare, batangaza ko umaze kubateza imbere.

Ezekiyeli Nsengimana ni umusore w’imyaka 24 ufite ubumuga bwo kutumva no kutavuga mu mvugo ye yatangaje ko nk’abafite ubumuga runaka bitavuze ko batagomba gukora ahubwo ko nabo bagomba gukora icyababeshaho.

Yagize ati: “ mfite umubyeyi umwe kandi nawe arashaje n’abavandimwe banjye 4, rero aho kuguma mu rugo ndushya umusaza nahisemo kwihangira umurimo wanteza imbere ntitayeko mfite ubumuga bwo kutumva no kutavuga.”

Nsengimana arakomeza avuga ko nyuma yo guhanga umurimo we yahisemo no gufasha abandi bana babasore batavuga kandi batumva akabaha akazi bakamufasha kandi bose bamaze kwiteza imbere.

Yagize ati: “ aba ngaba ureba aha bose ntibumva ntibavuga, ariko barakora kandi abantu bose bamaze kutumenya kuko banyandikira n’ubutumwa bufugi kuri telefoni ngo mbazanire mare cyangwa nzazibakorere bakambwira izo bashaka, tukazikora.”

Twifuje kumenya niba badahohoterwa n’abandi baturage bitwaje ko wenda batavuga ariko Nsengimana ahamya ko ntakibazo bahura nacyo n’iyo bagurisha bakorana neza n’abakiliya babo.

Yagize ati: “nubwo amatwi atumva ariko mbibonera ku munwa iyo umuntu avuga ndamukurikirana nkamenya icyo ari kumbwira tutakumvikana ibiciro tukandika, ntawujya aduhohotera niyo tutari mukazi ntakibazo rwose.”

Uyu musore ku kwezi yinjiza amafranga arenga 150,000 ku kwezi iyo bakoze neza, yarangiza agahemba bagenzi be baba bamufashije buri wese akabona aho aba, akigaburira kandi akabona n’umwambaro.

Follow

Get every new post delivered to your Inbox

Join other followers